ஜகுசியா

 

 Yakutia, Russia

ரஷ்யாவின் ஒரு பகுதி. இந்த மக்களின்   வாழ்வியல் வெப்பநாடுகளில் இருக்கும் மக்களின் வாழ்வியலுக்கு நேர் எதிர். கடும் குளிரிலே (-50°  or - 60°) அவர்களது வாழ்க்கை  ஓடுகின்றது. வருடத்தில் குளிர்காலமே அவர்களுக்கு நீண்டதாக இருக்கும். கோடைகாலம் மிகவும் குறைவு (3 மாதங்கள்).  கொழுப்புள்ள உணவை அதிகம் எடுப்பார்கள். பச்சை இறைச்சியை உண்பார்கள். இறைநம்பிக்கை நிறைய இம்மக்களுக்கு இருக்கின்றது.

ஜஸ் குளியல் இடையிடையே செய்வார்கள். இது அவர்களது, உடலுக்கு உறுதியைத் தருவதாக உணர்கின்றார்கள்.  அத்துடன் இயற்கை அன்னையுடன்  இணைவதாகவும் கருதி, அந்த கடும்குளிரைத் தாங்குகின்றார்கள்.  அப்பிரதேச மக்கள் வேறு இடங்களுக்கு இடம்பெயர விரும்பவில்லை. தமது பிரதேசமே சிறந்தது என்ற எண்ணத்தில் தான் அவர்களும் இருக்கின்றார்கள். வேறு காலநிலையில் வாழ்வது அவர்களுக்கு கடினம்.  

கலைமான்கள் அதிகம் அப்பிரதேசத்தில் இருக்கின்றன. அவர்கள் உடமைகளை இழுத்துச்செல்ல அவை உதவுகின்றன. அம்மான்கள் பனிக்கட்டிகளையும் உண்ணும்.  ஆறுகள் குளங்கள் எல்லாம் குளிர்காலத்தில் உறைந்து பனிக்கட்டிகள் போலே இருக்கும். அந்தப்பனிக்கட்டிகளுக்கு கீழே  நீர் இருக்கின்றது. அவற்றில் மீன்கள் வசிக்கின்றன..!  

அப்பிரதேச மக்கள், மேற்பரப்புப் பனிக்கட்டியை உடைத்து மீன்பிடிப்பதையும் தொழிலாகவும், விளையாட்டாகவும் செய்கின்றார்கள்.

இந்தப்பிரதேசத்தில் வாழும் குதிரைகளும் மிக மிகச் செழிமையாக இருக்கும். வழமையான தாவர உணவுகள் தாண்டிப் பனிகாலத்தில் பனிக்கட்டிகளையும் இவைகள் உண்ணும்..!

ஆ.கெ.கோகிலன்
05-02-2023.